ആ മലയുടെ മുകൾഭാഗം മുഴുവനും പ്രശാന്തസുന്ദരമായ പുൽമേടാണ്. ഇടയിൽ ഒറ്റയോറ്റയായുള്ള കുറെ മരങ്ങളുമുണ്ട്. പാതിയുറക്കത്തിൽ എന്തോ സ്വപ്നം കണ്ടെന്ന പോലെ നിൽക്കുകയാണവ. ആകാശത്തെ ചുംബിച്ചു നിൽക്കുന്ന പർവ്വതങ്ങളാണ് ഡിയോറിയക്ക് ചുറ്റിലും. ഒരു വശത്തായി അകലെ മഞ്ഞിൽ മറഞ്ഞിരിക്കുന്ന ഹിമാലയം കാണാം. ടെന്റിൽ നിന്നും കുറച്ചകലെയായി ഒരു വാച്ച് ടവർ നിൽപ്പുണ്ട്. അവിടെ നിന്നും കുറച്ചു കൂടി നല്ല കാഴ്ച ലഭിക്കുമെന്ന് ഞാൻ ഊഹിച്ചു. പിന്നെയുള്ളത് വ്യക്തമായ ആകൃതിയില്ലാതെ പരന്നു കിടക്കുന്ന വലിയ തടാകമാണ്. ഡിയോറിയ താൽ. കണ്ടാൽ അസൂയ തോന്നും വിധം നിശ്ചലമായി ഉറങ്ങുകയാണത്. കയ്യിൽ കിട്ടിയ ഒരു ചെറിയ കമ്പ് അതിന്‍റെ സ്വകാര്യതയിലേക്കെറിഞ്ഞ് അതുണ്ടാക്കിയ അസ്വസ്ഥതയുടെ അലകൾ കണ്ട് ഞാൻ ആഹ്ലാദിച്ചു. ചിലപ്പോഴൊക്കെ ഞാനും ഒരു സാഡിസ്റ്റാണ്.

Read more »